Коj е побожен и богољубив, нека се наслади од ова чудесно и светло торжество. Коj е благоразумен слуга, радуваjќи се нека влезе во радоста на своjот Господ. Коj се потрудил постеjќи, сега нека jа прими своjата награда. Коj работел од првиот час, денес нека jа прими заслужената плата. Коj дошол во третиот час, нека празнува со благодарност. Коj стигнал по шестиот час, нека не се сомнева, зашто не ќе загуби ништо. Коj го пропуштил и деветиот час, нека пристапи без колебање и страв. Коj стигнал дури во единаесеттиот час, нека не се плаши поради доцнењето: бидеjќи овоj прекрасен Господар е дарежлив – го прима последниот како и првиот, го успокоjува оноj коj дошол во единаесеттиот час, исто како и оноj коj работел од првиот час. На едниот му дава заслужена награда, а другиот го милува; на едниот му дава, а на другиот му дарува; делата ги прима, а намерата jа почитува; и трудот го цени и приносот го фали.
Затоа, влезете сите во радоста на своjот Господ; и првите и останатите плата примете; богати и сиромаси, еден со друг ликуваjте; кои се воздржувавте и кои сте биле мрзливи, чествуваjте го денот; и вие кои постевте и вие кои не постевте, веселете се денес! Трпезата е преполна, сите насладете се! Телето е угоено, никоj да не си замине гладен, сите насладете се со гозбата на верата, примете го богатството на добрината! Никоj да не се жали поради сиромаштиjата, зашто се покажа заедничкото царство. Никоj да не ги оплакува гревовите, зашто од гробот заблеска прошка. Никоj нека не се плаши од смртта, зашто смртта на Спасителот нè ослободи; jа изгасна Оноj Коj беше задржан од неа. Го заплени адот Оноj Коj слезе во него, се огорчи адот вкусуваjќи го Телото Негово.
И, предвидуваjќи го ова, Исаиjа воскликна: Адот се огорчи, кога долу Те сретна; се огорчи, зашто беше опустошен; се огорчи, зашто беше исмеан; се огорчи, зашто беше умртвен; се огорчи, зашто беше урнат; се огорчи, зашто беше окован; прими тело, а Го наjде Бога; прими земjа, а сретна небо; Го прими она што го гледаше, а падна во она што не го гледаше.
Каде ти е, смрт, бодилото? Каде ти е, Аду, победата? Воскресна Христос и ти се струполи! Воскресна Христос и паднаа демоните! Воскресна Христос и се радуваат ангелите! Воскресна Христос и животот победи! Воскресна Христос и ниеден мртов не остана во гробот. Зашто Христос воскресна и стана првина меѓу умрените. Нему слава и чест низ сите векови. Амин.
Христос воскресна! Навистина воскресна!
